十一月二十日 星期四 約左模擬法庭大賽部分學生8:15 a.m. 0係學校大門口集合去參觀法庭，點知d學生等黎等極都未到，原來佢地想聽哂d宣佈先落黎（-_-"）。聽哂d宣佈先走，我地就遲到架啦。不過都唔夠其中一個學生犀利，我地八點半都仲未見佢，於是搏一搏打佢手提，原來佢仲0係屋企囉﹗（-_-"）（我地0既番學時間係8:05 a.m.） 上年參觀0既係高等法院，今年就係荃灣裁判法院。設施就梗係高等多d，但今次我地有得睇埋聆訊，投入感高好多，雖然唔係咩大案。 參觀後感﹕d裁判官好似我地老師咁，例如要好循循善誘咁指導d被告（學生）講野唔好off-track，又例如要以街市講價方式黎追罰款（追功課）。唔同0既地方係，courtroom好寧靜，班房好鬼嘈。 班房可以有幾嘈？敝班就係一個好例子。有同事話佢地唔係嘈，只係反應慢d……我今日做過實驗，由我行入課室叫佢地起身，唔講任何野加間唔中（我以為）怒睥d滋事分子，等佢地靜，足足等左15分鐘。我講左一句野後又嘈，我又等左5分鐘。再講多句，又嘈，再等多5分鐘。周而復始，大家企左差唔多35分鐘（即是一堂），我講左句「我真係唔放心俾你地坐低，我好怕你地一坐低後又講野。如果你地可以應承我，坐低後噪音唔會超過我可以容忍0既程度，我先會俾你地坐。如果你地又嘈，你地又要企起身，我一句野都唔會教。」佢地肯應承我，跟住0個堂我先至可以好舒服咁教書。唉，上一個double，要用一堂黎罰人，先得到一堂0既安靜。反應慢？係囉，真係超慢﹗ 番到屯門，經過百貨公司，見到d聖誕飾物同聖誕卡……唉，買俾2D啦﹗就0係我揀緊聖誕卡0既時候，身後有一對父子有以下對話﹕ 子﹕我想寫聖誕卡俾老師呀﹗
父﹕俾所有老師呀？三十幾個架喎﹗駛唔駛呀？
子﹕我剩係寫俾教我0既老師，有八個。
父﹕你睇下d聖誕卡幾貴（然後計一大輪數），送俾八個老師要好多錢架，阿爸賺錢好辛苦架﹗咁啦，剩係送俾班主任好啦，其他一個星期先見一次0個d唔好送啦﹗
子﹕爸爸，唔好啦，我真係好想寫呀﹗
父﹕唏，你買左都唔知係咪真係寫0既。唔好啦，叫埋你阿媽過黎同你講。 我真係好想同佢講﹕「你個仔想寫聖誕卡俾老師係一個好行為黎架，如果唔想駛咁多錢0既話咪買d平d 0既，或者自製都好丫。你個仔寫聖誕卡俾老師咪好囉，我做老師0既都要jit d時間出黎寫41張卡俾學生啦﹗」不過我都係冇同佢講……如果2D有人送張卡俾我，我可能會感動到痴左線……
十一月二十一日 星期五 學校旅行，去大帽山。 旅遊車上非常安靜，我細個去旅行時，大家0係架車上嘈喧巴閉，咁先似旅行架嘛﹗d學生話佢地專心於聽歌，所以唔傾計喎﹗唉，有代溝﹗ 到達時d爐已經所剩冇幾。好在最後d學生同我地老師自己都有爐燒野食，未至於要做野人。 2D真係睇少一眼都唔得，尊貴0既黃小姐、孫先生同周先生趁老師睇唔到，就玩「互淋汽水」。三個人淋到成件班衫都濕哂，家下係咪怪我臨出發前冇warn大家唔好「玩水」呀？我見今日去大帽山，就冇講唔好「沙灘嬉水」同埋唔好「玩水鎗」，真係估唔到你地咁有創意去玩汽水囉﹗我真係冇野好講。 一番到學校就捉呢三個尊貴0既學生入校務處鬧，然後再通知家長。搞掂哂後，時間剛剛好，之前約左見面0既家長就黎到，又進行左歷時一小時四十五分鐘0既家長會面。 救命﹗
十月二十二日 星期六 食完飯後，番學校check files同埋打電話俾3BE各個未齊files 0既學生。其中以蕭小姐最「尊貴」啦，由中一識到佢依家都仲係咁「尊貴」，我呢d「平民老師」真係配唔起教呢d「大小姐」呀﹗蕭先生都好「尊貴」架，以「都唔係個個交哂files」為理由而自己唔交file，上次冇帶TSA listening又話我唔播CD，阻住d有帶0既人0既進度。自己d野都未做好，又會有資格講野0既？ | 
）